Mobvoi ဟာ Wear OS သုံးထားတဲ့ စမတ်နာရီ TicWatch Pro ကို ကြေညာလာခဲ့တာ တစ်နှစ်တင်းတင်းပြည့်ပြီ ဖြစ်ပါတယ်။ TicWatch Pro မှာ ရုပ်ထွက်နှစ်ခု၊ အဆင့်မြင့်ဒီဇိုင်း၊ အားကစားလှုပ်ရှားမှုစနစ်များပါ၀င်တဲ့အပြင် များပြားတဲ့ ဘက်ထရီပါ၀င်တာကြောင့် လူကြိုက်များကြပါတယ်။

ယနေ့မှာ Mobvoi ဟာ ဒုတိယမျိုးဆက် TicWatch Pro ကို ကြေညာလာပါတယ်။ ဒုတိယမျိုးဆက် TicWatch Pro က 4G LTE အသုံးပြုနိုင်ပါတယ်။ စီလီကွန်လက်ပတ်အသုံးပြုထားကာ ဒီဇိုင်းပိုင်း အပြောင်းအလဲ လုပ်ထားပါတယ်။ TiWatch Pro 4G/LTE မှာ အားကစားလှုပ်ရှားမှုကို အလိုအလျောက်စောင့်ကြည့်နိုင်တဲ့စနစ်၊ နှလုံးခုန်နှုန်းတိုင်းစနစ် ပါ၀င်ပါတယ်။

TiWatch Pro 4G/LTE မှာလည်း ရုပ်ထွက်နှစ်ခုပါ၀င်ပြီး AMOLED နှင့် FSTN LCD ရုပ်ထွက် ပါ၀င်ပါတယ်။ FSTN LCD ရုပ်ထွက်က အလင်းရောင်တိုက်ရိုက်ကျတဲ့အချိန်မှာတောင် ကြည့်နိုင်ပြီး ဘက်ထရီသုံးစွဲမှုကလည်း နည်းပါးပါတယ်။ AMOLED ရုပ်ထွက်မှာ Wear OS သုံးနိုင်ပါမယ်။

Essential Mode သုံးရင် FSTN LCD ရုပ်ထွက်မှ အချိန်၊ နှလုံးခုန်နှုန်း၊ ခြေလှမ်းအရေအတွက်တို့ကို ကြည့်နိုင်ပါမယ်။ Smart စနစ်တွေကိုတော့ သုံးလို့မရပါဘူး။ TiWatch Pro 4G/LTE မှာ ရက် 30 ကြာ အသုံးပြုနိုင်တဲ့ ဘက်ထရီ ပါ၀င်ပါတယ်။

TiWatch Pro 4G/LTE မှာ eSIM ပါ၀င်တာကြောင့် အင်တာနက်ချိတ်ဆက်နိုင်ပါတယ်။ ဒါ့အပြင် Number Sharing ၊ Cloud Synchronization စနစ်တို့လည်း ထောက်ပံ့ထားတာကြောင့် ဖုန်းခေါ်ဆိုမှု လက်ခံခြင်း၊ မက်ဆေ့ချ်ဖတ်ခြင်း၊ Notification ကြည့်ခြင်းတို့ကိုလည်း ပြုလုပ်နိုင်ပါတယ်။ Wi-Fi ၊ Bluetooth သုံးနိုင်သလို NFC ပါ၀င်တာကြောင့် Google Pay သုံးနိုင်ပါမယ်။

TiWatch Pro 4G/LTE ကို ခေတ်အနည်းငယ်နောက်ကျနေပြီဖြစ်တဲ့ Qualcomm Snapdragon Wear 2100 ၊ RAM1GB နှင့် ပါ၀ါထောက်ပံ့ထားပါတယ်။ တစ်ခုသတိပြုရမယ့်အချက်ကတော့ ဒီဖုန်းမှာ အိပ်ချိန်စောင့်ကြည့်စနစ် မပါ၀င်ပါဘူး။ Mobvoi အနေဖြင့် လာမယ့် Update မှာမှ ယင်းစနစ်ကို ထည့်သွင်းပေးလာမလား စောင့်ကြည့်ရပါမယ်။

TiWatch Pro 4G/LTE ရဲ့စျေးနှုန်းက ဒေါ်လာ 279 ဖြစ်ပါတယ်။

Credit : NetGuide Journal (Every Wednesday)