နာမည်ကြားတာနဲ့မြန်မာနိုင်ငံရဲ့ဘယ်နေရာမှာရှိတယ်ဆိုတာကိုတော်တော်များများမသိကြပါဘူး။ထူးခြားတဲ့ပွဲတော်တွေ ပင်လယ်မြို့လိုလိုတောင်ပေါ်မြို့လိုလိုနဲ့နှစ်ခုလုံးရဲ့အလှကိုတစ်ပြိုင်တည်းခံစားလို့ရတဲ့နေရာတွေ နက်ရှိုင်းတဲ့တောတောင်ရေတံခွန်စိမ့်စမ်းတွေ အရိုင်းဆန်တဲ့ကမ်းခြေတွေနဲ့ ဒီမြို့ဟာမြန်မာနိုင်ငံရဲ့တောင်ဘက်စွန်းတနင်္သာရီတိုင်းထဲမှာရှိတာပါ။မြင်သာအောင်ပြောရရင်တော့တောင်ဘက်စွန်းရဲ့အထင်ကရမြို့ကြီးတွေဖြစ်တဲ့ထားဝယ်နှင့်မြိတ်ကြားကားလမ်းမပေါ်ကသေးငယ်တဲ့မြို့လေးတစ်မြို့ပါပဲ။အတိအကျဆိုရင်တော့ထားဝယ်မြို့မှမိုင်၁၀ဝ မြိတ်မြို့မှမိုင်၅၀အကွာမှာရှိတာပါ။

တနင်္သာရီတိုင်းထဲမှာပင်လယ်စာအပေါဆုံး ဈေးအသက်သာဆုံးမြို့ဟာလည်းဒီမြို့ပါပဲ။ရှပ်လို့ခေါ်တဲ့ဂုံးတွေဆိုရင်ပုလောမှာအများဆုံးထွက်တာပါ။စစ်မှန်တဲ့တောင်ပိုင်းဒေသရဲ့အစားအသောက်တွေ ရာသီပေါ်အသီးအနှံတွေနဲ့အစားအသောက်အရမ်းပေါများတဲ့မြို့မို့ပုလောကိုတစ်ခါလာလည်ပီးတဲ့သူဟာဒီမြို့ရဲ့အစားအသောက်တွေကိုအမြဲသတိရနေတယ်လို့ပြောကြတယ်။မြန်မာနိုင်ငံထဲမှာအစားအသောက်ဈေးအပေါဆုံးမြို့ကိုညွှန်းမယ်ဆိုရင်ပုလောလို့ပဲပြောရမှာပါ။

ပုလောမှာဘာတွေလည်လို့ရလဲ

ကမ္ဘာလှတောင်ပါဒစက်တော်ရာဘုရား

တောင်ပေါ်ရှုခင်းအရမ်းလှတဲ့စက်တော်ရာဘုရားကတော့ပုလောမြို့တောင်ဘက်မြိတ်ကိုသွားတဲ့ကားလမ်းမပေါ်ကစက်တော်ရာရွာမှာရှိတာပါ။အရင်တုန်းကတော့သင်္ကြန်အပီးဘုရားပွဲတော်အချိန်မှဘုရားဖူးတွေနဲ့စည်ပီး အခုတော့တောင်တက်ကားလမ်းမကြီးဖောက်လိုက်တော့ နေ့ညအချိန်ခါမရွေးသွားလာတဲ့သူတွေများလာပါပီ။တောင်တက်တာကြိုက်တဲ့သူဆိုရင်ခြေလျင်တက်တဲ့လမ်းကတက်လို့ရပီး သစ်ပင်တွေအုံ့ဆိုင်းနေတော့အရမ်းသာယာပါတယ်။

ဖိုးရှမ်းကမ်းခြေ

ပုလောကအစည်ကားဆုံးကမ်းခြေပါ။ကမ်းခြေဧရိယာကျဉ်းပေမယ့် ရေလယ်ဘုရားလည်းရှိတယ် ဘုရားရဲ့အောက်ခြေမှာ ကျောက်ဆောင် ကျောက်တုံးတွေနဲ့ ဆိုတော့ဓာတ်ပုံရိုက်လို့အရမ်းလှတယ်။ကမ်းခြေနဲ့ရေလယ်ဘုရားကိုဆက်ထားတဲ့သစ်သားတံတားကတော့ဓာတ်ပုံအရိုက်များဆုံးနေရာတစ်ခုပါပဲ။ကမ်းခြေမှာစားသောက်ဆိုင်တွေလည်းရှိတော့ညနေဘက်အကင်လေးတွေစားရင်းလေတဖြူးဖြူးနဲ့အရမ်းထိုင်လို့ကောင်းတာပဲ။ရေကျချိန်နဲ့ကြုံရင်တော့သဲပြင်ကြီးကိုအကျယ်ကြီးမြင်ရမှာပါ။အဲဒီကိုသွားချင်ရင်တော့ထားဝယ်ဘက်ကလာရင်ပုလောတံတားကြီးထိပ်မှာညာဘက်ချိုးတဲ့လမ်းတွေ့ပါလိမ့်မယ်၊အဲကနေတောက်လျှောက်သွားလိုက်ရုံပါပဲ။ရှပ်ပုံကျေးရွာကျော်တာနဲ့ဖိုးရှမ်းကမ်းခြေရောက်သွားတာပဲ။

မော်သာယာတောင်ထိပ်ရှုခင်းသာစေတီတော်

ပုလောမြို့ရဲ့မြင်ကွင်းကိုအပြည့်အဝမြင်ရတဲ့တောင်ပါ။အရှေ့ဘက်ကတောင်တန်းတွေရဲ့မှိုင်းညှို့နေတဲ့မြင်ကွင်းကိုကြည့်နိုင်သလိုအနောက်ဘက်ကကျွန်းတွေထိုးထိုးထောင်ထောင်နဲ့ပင်လယ်ပြင်ကြီးကိုလည်းမြင်နိုင်တာမို့ နေထွက်ချိန်ကောနေဝင်ချိန်ကောအရမ်းကြည့်လို့လှတဲ့တောင်ပါ။တောင်ပေါ်ကမြင်ရတဲ့တောင်တန်းနဲ့ပင်လယ်ကြားကမြို့ရှုခင်းကလှတယ်ဆိုတာထက်ကိုပိုပါတယ်။မြို့အထွက်မော်သာယာဘုန်းကြီးကျောင်းမုခ်ဦးကနေတက်ရပါတယ်။

အရှေ့ကျောင်းစေတီ

မော်သာယာတောင်မစည်ကားခင်က မြို့ရဲ့မြင်ကွင်းကိုကြည့်လို့ရတာ အရှေ့ကျောင်းတောင်စေတီပဲရှိပါတယ်။သူကမော်သာယာတောင်ထက်အနဲငယ်နိမ့်ပီးမြို့ထဲမှာပဲရှိတော့မြို့မြင်ကွင်းကိုပိုနီးနီးကပ်ကပ်မြင်ရပါတယ်။တောင်ပေါ်အထိကားရောက်ပါတယ်။

ကျောက်ဆည်(ခေါ်)ချောင်းလှချောင်း

ပုလောမှာကိုယ်အကြိုက်ဆုံးနေရာပါ။ပုလောမြို့အရှေ့ဘက်ကရင်တိုင်းရင်းသားတွေနေတဲ့ရွာမှာရှိတာပါ။လျှိုမြောင်အသွယ်သွယ်ကိုဖြတ်စီးလာတဲ့ချောင်းမို့မြင်ကွင်းကိုကအရိုင်းဆန်ပီးအရမ်းမိုက်ပါတယ်။raftingလုပ်ဖို့အရမ်းကောင်းမှာပဲလို့ကိုယ်တော့တွေးမိတယ်။ပုလောကနေမိနစ်၃၀လောက်သွားရပီး ကျောက်ခဲလမ်းပါနော်။ကားအမြင့်တွေဆိုင်ကယ်တွေနဲ့မှပဲသွားဖို့အဆင်မော်သာယာတောင်ပေါ်ကနေဝင်ချိန်အလှပြေပါတယ်။မီးကျောင်းသိုက်ကျေးရွာသွားတဲ့လမ်းပေါ်မှာရှိတာပါ။
အဲကိုသွားရင်းနဲ့ဒေသခံကရင်တိုင်းရင်းသားတွေရဲ့ရိုးရာအိမ်လေးတွေ လူနေမှုဘဝတွေကိုလည်းတစ်ခါထဲလေ့လာလို့ရတယ်။

ကျောက်လိပ်ရေတံခွန်

Adventureတွေအရမ်းကြိုက်တယ် ခက်ခက်ခဲခဲတွေသွားရတာကြိုက်တယ်ဆိုရင်တော့ကျောက်လိပ်ရေတံခွန်ကိုသွားဖို့ညွှန်းပါတယ်။ပုလောကုန်းကျေးရွာကတစ်ဆင့်သွားရတဲ့ကျောက်လိပ်ရွာမှာရှိတာပါ။သွားရင်ရောက်မယ့်နေရာကရေတံခွန်အပေါ်ကိုပါ။ရေတံခွန်အောက်ကိုဆင်းချင်ရင်ရေတံခွန်ဘေးလမ်းလေးကနေဆင်းလို့ရပါတယ်။သစ်ပင်တွေ နွယ်ကြိုးတွေကိုင်ပီးသတိထားဆင်းရမှာပါ။ကားနဲ့ကျောက်လိပ်ရွာအထိသွားပီး ရေတံခွန်ကိုတောလမ်းလေးကနေtrekkingလျှောက်လည်းရပါတယ်။ဆိုင်ကယ်ဆိုရင်တော့ရေတံခွန်နားအထိသွားလို့ရတယ်။

သာယာကုန်းကြိုးတံတား

ဓာတ်ပုံရိုက်တာလှလို့နာမည်ကြီးပါတယ်။နိုင်ငံခြားကလာလှူထားတဲ့တံတားပါ။နန်းတောင်လမ်းအတိုင်းသွားရင်ဂျင့်ဂါရွာမှာလမ်းခွဲပီးတည့်တည့်ဆက်သွားရင်ဒူးရင်းပင်ရှောင်ကျေးရွာမှာသာယာကုန်းဘက်သွားတဲ့လမ်းခွဲရှိပါတယ်။ဒီဒေသမှာဘယ်သူ့ကိုလမ်းမေးမေးပြောပြပါတယ်။တကယ်လို့သွားရတာအဆင်မပြေရင်ဒေသခံတွေကိုမေးလို့ရတယ်။

ကျားဆုခံပွဲ(ခေါ်)ကုလားကျားပွဲ

မြန်မာနိုင်ငံရဲ့အထူးခြားဆုံးပွဲတော်တွေထဲကတစ်ခုပါ။လူတွေကိုကျားတစ်ကောင်အသွင်ဆေးခြယ်ပီးကပြဖျော်ဖြေစေတာပါ။ဗုံသံစည်းချက်အလိုက်ညီညာစွာကပြဖျော်ဖြေရပီးတစ်ခါတရံလူစိတ်ပျောက်ကာကျားစိတ်ဝင်လာပီး မိမိလက်ကိုပင် ပြန်ကိုက်တတ်ပါသည်။ ဒီလိုကျားစိတ်ဝင်လာရင် အနောက်ကလူတွေကဝိုင်းထိန်းကာ လောဘတ်ပေးရှူရပါတယ်။ လောဘတ်ပေးရှူလိုက်ရင်ကျားစိတ်ပြန်ပျောက်သွားပါတယ်။သင်္ကြန်ကာလမတိုင်ခင်တစ်ပတ်လောက်အလိုကစပီးသင်္ကြန်အကြိုနေ့အထိသက်ဆိုင်ရာဘုန်းကြီးကျောင်းအလိုက်ကပြဖျော်ဖြေကြပါတယ်။တစ်နှစ်ကို၄ရက်ကပြဖျော်ဖြေကြပါတယ်။ရသည့်အလှူငွေတွေဘုန်းကြီးကျောင်းကိုပြန်လှူကြတာမျိုးဖြစ်တယ်။ဒီပွဲတော်ကိုကျင်းပလာတာနှစ်ပေါင်း(၉၀)ကျော်နေပါပီ။

အခြားပွဲတော်တွေ လည်ပတ်စရာတွေလည်းအများကြီးကျန်ပါသေးတယ်။ကိုယ်တိုင်သွားတဲ့အခါမှထပ်တင်ပေးပါ့မယ်။

ပုလောကိုအလည်ပတ်သင့်ဆုံးအချိန်ကတော့သင်္ကြန်ခါနီးအချိန်ပဲဖြစ်တယ်။ဒီအချိန်ဆိုအဝေးရောက်မြို့သူမြို့သားတွေလည်းအများဆုံးပြန်လာကြပါတယ်။ကျန်တဲ့အချိန်တွေလည်း၁၂ရာသီမရွေးလည်ပတ်လို့ရပေမယ့် မိုးရာသီဆိုရင်တော့အချိန်အကြာကြီးမိုးကရက်ဆက်ပီးရွာနေတတ်ပါတယ်။အချိန်၂ရက်လောက်ပေးရင်ကိုစုံစုံလင်လင်လည်ပတ်လို့ရပါပီ။လမ်းကြုံလို့ခဏတဖြုတ်လည်ပတ်ချင်ရင် မော်သာယာတောင် ဖိုးရှမ်းကမ်းခြေ စက်တော်ရာဘုရားတို့ကိုလည်ပတ်လို့ရပါတယ်။မြိတ်ကိုလည်ပတ်ရင်းပင်လယ်ထဲသွားလို့မရတဲ့အချိန်တွေမှာပုလောကိုလည်လို့ရတယ်နော်။

တည်းခိုဖို့နေရာတွေလည်းအဆင်ပြေနေပါပီ။

သုခထက်စံ guest house

Royal Hostel တို့မှာတည်းခိုလို့ရပါတယ်နော်။နောက်ထပ်ဟိုတယ်ထပ်ဆောက်နေတာလည်းရှိပါတယ်။
ကားနဲ့လာမယ်ဆိုရင်မြိတ်ရောက်တဲ့ကားဘာကားစီးစီးပုလောရောက်ပါတယ်။ပုလောမှာကျန်ခဲ့ရုံပါပဲ။

နောက်မှစားသောက်ဖွယ်ရာတွေကိုသက်သက်ထပ်ရေးပါဦးမယ်။အောက်ကပုံလေးတွေနဲ့တွဲထားတဲ့စာလေးတွေဖတ်စေချင်ပါတယ်။❤️

ပုလောကအစားအသောက်တွေအကြောင်းဖတ်ချင်ရင်

https://www.facebook.com/886399875033908/posts/935680493439179/

Credit : https://www.facebook.com/zanflyingsolo