သင်သာ Social Media ကို တွင်တွင်ကျယ်ကျယ်အသုံးပြုသူဆိုရင် Little Boss ဆိုင်ကို မသိစရာအကြောင်းမရှိဘူးလို့ထင်တယ်။ မသိခဲ့ရင်လည်း ကျွန်တော်တို့ အခုအချိန်ကနေ စပြီး သင့်ကို သွားရေကျလောက်အောင် ရှင်းပြပေးသွားမှာဖြစ်လို့ လိုက်ပါကြည့်ရှုပေးပါအုံး။

 Little Boss မှာ ဘယ်လိုအစားအသောက်တွေကို အဓိကထားပြီးရောင်းချပေးသလဲဆိုရင် ဖက်ထုတ်နဲ့  တရုတ်‌ခေါက်ဆွဲ အစရှိတဲ့ အမျိုးအစား (၂)မျိုးကို အဓိက ထားပြီးရောင်းပေးပါတယ်။

အမျိုးအစား (၂)မျိုးကိုမှ ဟင်းအမည်များများစားစားနဲ့ ရွေးချယ်စရာတွေရှိတယ်လို့ပြောရမယ်။ တစ်ခုရှိတာက သူတို့မှာပေးတဲ့ အချဉ်ရည်ကို သိပ်မကြိုက်ကြဘူးလို့ကြားတယ်။ ကျွန်တော်ကတော့ food blogger တစ်ယောက် အကြံပေးတဲ့အတိုင်း ရှာလကာရည်နဲ့ ဂျင်းကို တွဲပြီး အချဉ်စပ်လိုက်တာ လွှတ်ကို စားကောင်းတော့တာပဲဗျာ။ ကဲ…ဒီလိုဆိုတော့ ကျွန်တော်စားခဲ့တဲ့ အစားအသောက်တွေကို တစ်မျိုးချင်းစီ ရှင်းပြပါမယ်။

(၁) ဖက်ထုပ်ကြော်

ဒီ ဖက်ထုပ်ကြော်မှာ Menu (3) မျိုးရှိပါတယ်။ (House Special/ Signature/ နှစ်မျိုးစပ် ဖက်ထုပ်ကြော်) ရယ်ဆိုပြီး (၃)မျိုးရှိပါတယ်။ ကျွန်တော်ကတော့ Signature ဖက်ထုပ်ကြော် မှာခဲ့ပါတယ်။ ဒီဖက်ထုပ်ကြော်ကို စားလိုက်တာနဲ့ ကျွန်တော် ပြောပြချင်တာကတော့ လုံး၀ ကို ဂျင်းထည့်ခံလိုက်ရပါပြီ။ ကျွန်တော်တို့ စားဖူးတဲ့ ဖက်ထုပ်တွေက အရွက်တွေချည်းပါပဲ။ သူကတော့ ဖက်ထုပ်အရွက် ကအစ အရမ်းအရသာရှိပြီး အထဲမှာလည်း အသားတွေ နင့်နေအောင် ပါ၀င်ပါတယ်။

ရှာလကာရည်ကို ဂျင်းနဲ့ တွဲပြီး အချဉ်စပ်လိုက်ပါ။ ပိုပြီး စားကောင်းပါလိမ့်မယ်။

အကြီးကြီးတွေလည်း မဟုတ်သလို သေးသေးလေးတွေလည်း မဟုတ်ပါဘူး။ အလတ်အနေအထားမှာရှိပါတယ်။ ဖက်ထုပ် ၁၆ ခုပါ၀င်ပြီး တန်ဖိုးက ၃၅၀၀ ကျပ်ပါ။

(၂) ရောင်စုံဖက်ထုပ်ပေါင်း

အမှန်တော့ ဒီဆိုင်မှာ ဖက်ထုပ်ပေါင်း (၆)မျိုးရှိပါတယ်။ ကျွန်တော်တို့ little boss ဆိုင်ကို Social Media ပေါ်မှာ စတင်မြင်တွေ့ခဲ့ရတဲ့အချိန်မှာ အဆိုပါရောင်စုံဖက်ထုပ်ပေါင်းတွေကို အနှံ့မြင်တွေ့ခဲ့ရတာပါ။ အဲ့ဒီတော့ ရောင်စုံဖက်ထုပ်ပေါင်းကို မြည်းစမ်းဖို့အတွက် အသင့်အနေအထားနဲ့ ရှိနေပါတယ်။

သူ့မှာတော့ ဖက်ထုပ် ၅မျိုးကိုမှ စုစုပေါင်း ၁၀ခုပါ၀င်ပါတယ်။ Charcoal/Original/ပုဇွန်/မျှစ်ချဉ်/ခုချိုင် ဆိုပြီး အမျိုးအစား (၅)မျိုးပါ၀င်ပါတယ်။ စားကောင်းပါတယ်။ ရှာလကာရည်အမည်းနဲ့ စားပါ။ တန်ဖိုးကတော့ (၃၀၀၀) ကျပ်ပါ။

(၃) တရုတ်လက်လုပ်ခေါက်ဆွဲ

ဒီ တရုတ်လက်လုပ်ခေါက်ဆွဲမှာ ကိုယ်ကြိုက်တဲ့ ခေါက်ဆွဲအသားကို စိတ်ကြိုက်ရွေးချယ်လို့ရပါတယ်။ Charcoal/မြေစာဥ/ကြက်ဥ/မုန်လာဥနီ/ဟင်းသီးဟင်းရွက်ခေါက်ဆွဲ ဆိုပြီး ခေါက်ဆွဲ(၅)မျိုးရွေးချယ်လို့ရပါတယ်။

ကျွန်တော်ကတော့ ၀က်နံရိုးခေါက်ဆွဲကို ရွေးခဲ့ပါတယ်။

ဒီနေရာကနေ စပြီး ၀က်နံရိုးအကြောင်းပြောပါတော့မယ်။ အမှန်တော့ ဒီအကြောင်းကိုပြောချင်လို့ ကို စောင့်နေတာပါ။ ၀က်နံရိုးဆိုတာ လွှတ်ကို အရသာရှိပါတယ်။ ၀က်နံရိုးရဲ့ နူးညံ့မှုက အရိုးအထိကို နူးညံ့နေပါတယ်။ ခေါက်ဆွဲအရည်ရဲ့အရသာက ၀က်နံရိုးအထိကို အရသာ၀င်ပါတယ်။ အရမ်းအရသာရှိပါတယ်။ ၀က်နံရိုးတစ်တုံး တစ်တုံးကို လည်း ဟဲဗီးကြီးတွေပါ။ Little Boss မှာ စားလို့အကောင်းဆုံးပါပဲ။

ခေါက်ဆွဲကတော့ ပျော့ပါတယ်။ တော်တော်များများသိပ်မကြိုက်ကြပါဘူး။ ဟင်းရည်ကတော့ တကယ့်ကို တရုတ်အရသာ စီချွမ်အရသာ အစစ်ကို ရပါတယ်။

(၄) ကြက်ခြေထောက်ပေါင်း

၀က်နံရိုးခေါက်ဆွဲပြီးရင် အကြိုက်ဆုံးပါပဲ။ သူ့မှာ ကြက်ခြေထောက် (၅)ခုပါ ပါတယ်။ ဟင်းရည်ရဲ့အရသာဟာ ကြက်ခြေထောက်အထဲအထိကို ၀င်ပါတယ်။ စာဖိုမှုးရဲ့ ကျွမ်းကျင်မှုကတော့ ကျွန်တော်တို့ပြသချရလောက်ပါတယ်။ တန်ဖိုးကတော့ ၂၅၀၀ ကျပ်ပါ။   Little Boss ကို ရောက်ရင် မဖြစ်မနေစားဖို့အတွက် အကြံပေးလိုက်ပါတယ်။

တစ်ခုပြောချင်တာက ဒီဆိုင်မှာ အချိုမှုန်လုံး၀ သုံးထားခြင်းမရှိပါဘူး။ ဒါကြောင့်အရသာက ပေါ့ကောင်းပေါ့နေပါလိမ့်မယ်။အချဉ်ရည်လေးနဲ့ ဖြည့်စွက်ပြီး စားသောက်နိုင်ပါကြောင်း သတင်းကောင်းပါးလိုက်ပါရစေရှင်။

By : Theingi Kyaw