ရန်ကုန်မှာ ရိုးရားအစားအစာတွေက နောက်ပိုင်းအစားများလာကြပါတယ်။ အနောက်တိုင်းအစားအစာတွေတောင်စားပြီး မြန်မာပြည်ရဲ့ ပြည်နယ်ခွဲတစ်ခုဖြစ်တဲ့ ကရင်ပြည်နယ်က အစားအသောက်တွေကို မစားဖူးသေးရင် မြန်မာလူမျိုး မပီသရာ ကြမှပေါ့။ အခုပြောပြပေးမယ့်ဆိုင်လေးက ကရင်ရိုးရာအတိုင်း စားသောက်ရမယ့် ဆိုင်လေးတစ်ဆိုင်ပါ။

အစားအစာများထဲမှ ဒီတစ်‌ခါတော့ Yangon Style တို့ရောက်ရှိခဲ့တဲ့ နော်တယာဆိုတဲ့ ကရင်ဆိုင်လေးနဲ့ မိတ်ဆက်ပေးချင်ပါတယ်။

အစားအစာတွေဆိုရင် ရိုးရာအတိုင်းချက်ပြုတ်ပါတယ်။ စားခဲ့တဲ့အထဲကဆိုရင် ဆီပါတာဆိုလို့ ဟင်း တစ်ခွက်ပဲ ပါပြီး ဒါတောင် ပါတယ်ဆိုရုံ‌ပါတဲ့။ ဟင်း အကုန်လုံးက ဆီလုံး၀ သုံးမထားဘဲ အရသာရှိအောင်ချက်ထားတာပါ။ ဈေးတွေလည်း နှစ်ခါပြန်ကြည့်ရအောင် တန်လွန်းနေပြန်ပါတယ်။

သောက်စရာတွေအနေနဲ့ ကရင်ခေါင်ရည်ရသလို ကယားခေါင်ကျရည်လည်း ရလို့နေပြန်ပါတယ်။ ၀န်ဆောင်မှုကောင်းသလို လိုလေသေးမရှိပါဘဲ။

ဓာတ်ပုံရိုက်ချင်သူတွေအနေနဲ့ ဓာတ်ပုံရိုက်ချင်တယ်ဆိုရင် ကရင်အင်္ကျီလေးတွေ ၀တ်ပြီး ရိုက်လို့ရပါသေးတယ်။ ကရင် ရိုးရာ ပစ္စည်းလေးတွေ အမှတ်တရ၀ယ်ယူချင်ရင်လည်း ၀ယ်ယူလို့ရသေးတယ်။

အားနည်းချက်ဆိုရင် ဆိုင်လေးက နည်းနည်းကျဉ်းတာလေးတစ်ခုပါပဲ။ ကျန်တာလိုလေသေးမရှိပါဘဲ။

အလုံဘက်ရောက်ဖြစ်ခဲ့ရင် မှတ်တိုင်က ဂျန်မခါနာမှတ်တိုင်နဲ့ နီးပြီး အေးလမ်းထဲမှာပါ။ အထက်က၀င်မယ်ဆိုရင် ၀င်ရုံလေးနားမှာပါ။

စကောထမင်း (၂)ယောက်စာ ၈၀၀၀

စားဖြစ်ခဲ့တာကတော့ အစုံပါတဲ့ စကောထမင်း‌စားဖြစ်ခဲ့တယ်။ ဝါး သူ့ထဲမှာလည်း အရံဟင်းလေးတွေအစုံပဲ တောင်ယာဟင်း(သို့)ကရင်တောချက်၊ အသားသုပ် (ကြက်၊ ၀က်)၊ တာလပေါ့ဟင်းရည်၊ အရွက်သုပ်တစ်မျိုး၊ ငါးပိရည် တို့စရာအစုံ သူ့တင်ကို ကရင်စာ စုံနေပြီ။

တာလပေါ့ ချဉ်စပ် ၂၀၀၀

ကရင်ဆိုင်ရောက်ရင် တာလပေါ့ဟင်းရည်က မပါမဖြစ် စားသင့်တဲ့ အထဲမှာပါတယ်။ တာလပေါ့ဟင်းရည်ကို အချို၊ ချဉ်စပ်ရပြီး ချဉ်စပ်လေး သောက်ဖြစ်ခဲ့တယ်။ အလွတ်ဆို ၂၀၀၀ပဲဖြစ်ပြီး အသားနဲ့ ပင်လယ်စာတစ်ခုခုထည့်မယ်ဆို ၁၀၀၀ကျပ် ထပ်ပေးရပါမယ်။ အဲ့တစ်ထောင်က တော်တော်တန်တယ်။ ပုစွန်မှာလိုက်တာ ကြီးပြီး အများကြီးပဲ။ တာလပေါ့ တစ်ပွဲက ၃ယောက်လောက် အေးဆေးသောက်လို့ရတယ်။

ကရင်တောချက် (၀က်) ၂၅၀၀

ကရင် ၀က် တောချက်လေးလည်း စားဖြစ်ခဲ့တယ်။ တောချက်ဆိုတဲ့အတိုင်း ထမင်းမိန်စေတယ်။ အဆီတော့များတယ်။

ငှက်ပျောဖူးသုပ် ( ကြက် ) ၂၀၀၀

ကရင်အစားအစားတွေမှာ တာလပေါ့ဟင်းနဲ့ ငှက်ပျောဖူးသုပ်က အဓိက ကနေ ပါ၀င်တာမို့ ကရင်ငှက်ပျောဖူးသုပ်လေးလည်း စားဖြစ်ခဲ့တယ်။ ကြက်သားနဲ့ ယူလိုက်ပြီး ခါးသက်သက် ဆိမ့်ဆိမ့်လေးနဲ့ လက်က မချချင်အောင်ပါပဲ။

ငါးဆုပ်ဆန်လျော်ဟင်း ၂၀၀၀

ငါးဆုပ်ဆန်လှော်ဟင်းက အနှစ်ကောင်းပေမဲ့ ငါးဆုပ်က နည်းနည်းလေးတယ်။ သိပ်‌တော့အဆင်မပြေခဲ့ဘူး။ စားမယ်လို့ ရည်ရွယ်ထားရင် အပေါ့လုပ်ခိုင်းပါ။

ဆိုင်လေး သွားစားဖြစ်ခဲ့ရင် ကယားခေါင်ကျရည်လေးလည်း သောက်ခဲ့ပါ။ အစားအသောက်တွေနဲ့ ကရင်ရောက်ပြီးပြီဆိုတော့ ကယားခေါင်ရည်လေးနဲ့ ပိုစုံတာပေါ့။ ကရင် ခေါင်ရည်က ၆၅၀၀ကျပ် ဖြစ်ပါတယ်။ ကယားခေါင်ရည်ဆိုရင် ဗူးသေး၊ ဗူးကြီးရှိပြီး ဗူးသေး ၁၀၀၀နဲ့ ဗူးကြီး ၂၀၀၀ကျပ်ပါပဲ။

ဆိုင်လိပ်စာလေးလည်း သိသွားပြီဆိုတော့ ရန်ကုန်မှာရှိတဲ့ ကရင်စာစစ်စစ်ရတဲ့ နော်တ
ယာမှာ ဆုံလိုက်ကြပါစို့ဗျာ။

ဆိုင်လိပ်စာလေးကတော့

“ နော်တယာ”

ကရင်ရိုးရာ အစားအစာဆိုင်

အမှတ်(၃၅)၊ အေးလမ်း၊ အလုံမြို့နယ်။

09-792243412, 09-788248939

By : Nay