–      မြန်မာ့လွတ်လပ်ရေးနေ့ အထိမ်းအမှတ် နိုင်ငံတကာရုပ်ရှင်ပွဲတော် (မြန်မာနိုင်ငံပြပွဲ)ကို ဇန်နဝါရီ (၄)ရက် ညနေ (၃:၀၀)တွင် မြန်မာနိုင်ငံရုပ်ရှင်အစည်းအရုံးဝင်္ကဘာလမ်း၊ ဗဟန်းမြို့နယ်၊ ရန်ကုန်၌ ကျင်းပခဲ့သည်။

–      နိုင်ငံတာရုပ်ရှင်ပွဲတော်ကို မြန်မာနိုင်ငံရုပ်ရှင်အစည်းအရုံးနှင့် ကိုရီးယားနိုင်ငံ ဟန်အီး (Hangi)ရုပ်သံဖောင်ဒေးရှင်းတို့မှ ပူးပေါင်းတင်ဆက်ခြင်းဖြစ်ပြီး မြန်မာ့လွတ်လပ်ရေးနေ့ကို ဂုဏ်ပြုခြင်းနှင့် မြန်မာ့လွတ်လပ်ရေး ကြိုးပမ်းမှုနည်းတူ နိုင်ငံတကာမှ လွတ်လပ်ရေးကြိုးပမ်းရယူခဲ့မှုအပေါ် လူငယ်များအနေဖြင့် ရုပ်ရှင်အနုပညာကို ကြည့်ရှုကြခြင်းဖြင့် သိရှိနိုင်ကြစေရန်အတွက် ရည်ရွယ်ကာ ပြုလုပ်ခြင်းဖြစ်သည်။

–      အခမ်းအနားတွင် ရန်ကုန်မြို့တော်စည်ပင်သာယာရေးကော်မတီ ဒုတိယဥက္ကဌ ဦးစိုးလွင်၊ မြန်မာနိုင်ငံရုပ်ရှင်အစည်းအရုံးဉက္ကဌ ဉီးညီညီထွန်လွင်တို့မှ အခမ်းအနားကျင်းပရခြင်း ရည်ရွယ် ချက်များကို ရှင်းလင်းပြောကြားခဲ့သည်။

–      ထို့နောက် ကိုရီးယားဟန်အီး (Hangi) ရုပ်သံဖောင်ဒေးရှင်းမှ မစ္စယူရီမှလည်း မြန်မာ့လွတ်လပ်ရေးကြိုးပမ်းမှု သမိုင်းနှင့် ကိုရီးယားဟန်အီး (Hangi) ရုပ်သံလိုင်းမှ လာရောက်ရိုက်ကူး မှတ်တမ်းတင်ထားသော ရုပ်သံများကို ပြသခဲ့သည်။

–      ပြီးနောက်အခမ်းအနားကို ဖွင့်လှစ်ခဲ့ပြီး အမှတ်တရဓါတ်ပုံများ ရိုက်ကူးကြသည်။

–      ဆက်လက်ပြီး ညနေ (၄:၄၅)တွင် ဦးညွန့်ဝင်း၊ ဦးဝင်းဗိုလ်၊ ဦးဆန်းဝင်း၊ ဒေါ်ကြည်ကြည်ဌေး၊ ဒေါ်နှင်းဆီ၊ ဧည့်သည်သရုပ်ဆောင် ဒေါ်ဝါဝါဝင်းရွှေနှင့် သစ္စာမေတ္တာရွှေမန်းသဘင် အဖွဲ့သူအဖွဲ့သားများ ပါဝင် သရုပ်ဆောင်ထားသည့် (၁၉၇၂ခုနှစ်တွင် ရုံတင်ပြသခဲ့သော “ငါ့ညီငါ့မြေငါ့အမေ” ရုပ်ရှင်ဇာတ်ကားကြီးကို ပြသခဲ့သည်။

–      အဆိုပါရုပ်ရှင်ဇာတ်ကားတွင် မြန်မာ့လွတ်လပ်ရေးအတွက် ပြည်သူလူထုကိုယ်တိုင် လက်နက်စွဲကိုင်၍ အသက်ပေးကာ တိုက်ပွဲဝင်ခဲ့ကြပုံများကို ပုံဖော်ရိုက်ကူးထားခြင်း ဖြစ်သည်။

–      Jan 5 ရက်တွက်လည်း ကိုရီးယားနိုင်ငံ ဟန်အီရုပ်သံလိုင်းမှ ရွေးချယ်ပေးထားသော “ The Tiger” အမည်ရှိ ဇာတ်ကားကိုလည်း ပြသခဲ့သည်။

–      မြန်မာ့လွတ်လပ်ရေးနေ့ အထိမ်းအမှတ် နိုင်ငံတကာရုပ်ရှင်ပြပွဲ (မြန်မာနိုင်ငံပြပွဲ)သည် တတိယအကြိမ်မြောက်ဖြစ်ပြီး အဆိုပါပွဲကို အခမဲ့ပြသခဲ့ခြင်း ဖြစ်သည်။

By : Kyaw Thura Tun