အသက် (၉) နှစ် မှ အသက် (၁၀) နှစ် မိန်းကလေးများအား ၂၀၂၀ စက်တင်ဘာလတွင် ” သားအိမ်ခေါင်းကင်ဆာ ကာကွယ်ဆေး” ကို အခမဲ့ထိုးနှံပေးသွားမည် ဖြစ်ပါသည်။ ထို အစီအစဉ်ကို GAVI အဖွဲ့အစည်း နှင့် အစိုးရက ပူးပေါင်းလုပ်ဆောင်ခြင်း ဖြစ်ပါသည်။ အာရှနိုင်ငံများတွင် သားအိမ်ကင်ဆာကြောင့် (၄) မိနစ်တိုင်းတွင် အမျိုးသမီးတစ်ဦး သေဆုံးနေရခြင်း ဖြစ်ပါသည်။ မြန်မာနိုင်ငံသည်လည်း ဖြစ်ပွားမှုအများဆုံးနိုင်ငံစာရင်းတွင် ပါဝင်ကြောင်း WHO မှ ထုတ်ပြန်ထားပါသည်။ ထို့ကြောင့် သားအိမ်ခေါင်းကင်ဆာ ကို ပေါ့လျော့မနေဘဲ ပုံမှန်စစ်ဆေးပြီး ကာကွယ်ဆေးထိုးသင့် ပါသည်။

သားအိမ်ခေါင်းကင်ဆာ မှာ အသိနောက်မကျလျှင် ကုသပျောက်ကင်းနိုင်သည့် ကင်ဆာအမျိုးအစား ဖြစ်ပါသည်။ သားအိမ်ခေါင်းကင်ဆာ ကာကွယ်ဆေး သည် မိန်းကလေးများ အပျိုဖော်မဝင်မီ အရွယ်ဖြစ်သည့် အသက် (၉) နှစ်မှ အသက် (၁၀)နှစ်ကြား ထိုးနှံပေးထားခြင်းမှာ ကာကွယ်မှုအတွက် အထိရောက်ဆုံး အချိန်ပင်ဖြစ်ပါသည်။

HPV (Human Papilloma Virus) အကြောင်း

ဖြစ်ပွားရသည့် အဓိကအကြောင်းအရင်းမှာ HPV (Human Papilloma Virus) လို့ခေါ်သည့် ဗိုင်းရပ်စ်ကြောင့် ဖြစ်ပါသည်။ မြန်မာအခေါ်အဝေါ်အနေဖြင့်ဆိုလျှင် လိင်အင်္ဂါကြွက်နို့ပိုး ဖြစ်ပါသည်။ သားအိမ်ခေါင်း ကင်ဆာ၏ 99% သည် HPV ဗိုင်းရပ်စ်အမျိုးအစား 16 နှင့် 18 ကြောင့် ဖြစ်ပါသည်။ ထိုကြောင့် သားအိမ်ခေါင်းကင်ဆာ ကာကွယ်ဆေးသည် HPV 16 ၊ 18 ဗိုင်းရပ်စ်ကိုသာ ကာကွယ်ပေးပြီး အမျိုးသမီးများတွင်သာ အသုံးပြုသောဆေးဖြစ်ပါသည်။ HPV သည်အမျိုးအစား အများအပြားရှိခြင်းကြောင့် သားအိမ်ခေါင်းကင်ဆာအပြင် စအိုကင်ဆာ၊ ယောနိတွင်ဖြစ်သောကင်ဆာ၊ လိင်တံကြွက်နို့ ရောဂါတို့ကို ဖြစ်ပွားစေသည့် HPV 6 နှင့် 11 ဗိုင်းရပ်စ်တွေကို ကာကွယ်သည့် ဆေးလည်းရှိပါသည်။ ထိုဆေးမှာ Gardasil ကာကွယ်ဆေး ဖြစ်ပါသည်။ အမျိုးသားရော၊ အမျိုးသမီးပါ ထိုးနိုင်ပါသည်။ ထိုဆေးသည်လည်း အသက် (၉) နှစ် မှစပြီး ထိုးနိုင်ပါသည်။

သားအိမ်ခေါင်းကင်ဆာ ဘာကြောင့်ဖြစ်သလဲ

လိင်အင်္ဂါကြွက်နို့ပိုး ရှိသူနှင့် လိင်ဆက်ဆံခြင်း။
အသက်ငယ်ငယ်ဖြင့် အိမ်ထောင်ပြုခြင်း ( လိင်ဆက်ဆံမှု ပြုခြင်း) ။
လိင်ဆက်ဆံဖော်များခြင်း (အမျိုးသမီးမှာတစ်လင်တစ်မယားစနစ်ကျင့်သုံးသော်လည်း ခင်ပွန်းမှာ လိင်ဆက်ဆံဖော်များခြင်း) ။
ကလေး (၃) ယောက်နှင့်အထက် မွေးထားခြင်း။
အခြားလိင်မှကူးစက်သော ရောဂါများရှိခြင်း။
အခြားရောဂါများရှိသောကြောင့် ကိုယ်ခံအားနည်းနေခြင်း။
ဆေးလိပ်သောက်ခြင်း တို့ကြောင့် ဖြစ်ပွားမှုအများဆုံးဖြစ်ပါသည်။

ပုံမှန်စစ်ဆေးမှု ခံယူခြင်း

လိင်ဆက်ဆံဖက်မရှိသည့် ငယ်ရွယ်စဉ်အရွယ်တွင် ကာကွယ်ဆေးထိုးမည်ဆိုလျှင် စစ်ဆေးခြင်းမပြုလုပ်ဘဲ ထိုးနိုင်ပါသည်။ အိမ်ထောင်သည်များ နှင့် လိင်ဆက်ဆံဖူးသူများကတော့ သားအိမ်ခေါင်းချွဲယူ စစ်ဆေးခြင်း (Pap Smear) ပြုလုပ်ပြီးမှသာ ကာကွယ်ဆေးကို ထိုးရပါသည်။ ကာကွယ်ဆေးမထိုးလျှင်လည်း ပုံမှန်စစ်ဆေးမှုကို သက်ဆိုင်ရာဆရာဝန်များ၏ လမ်းညွှန်မှုဖြင့် လိုက်နာလုပ်ဆောင်သင့်ပါသည်။

သားအိမ်ခေါင်းကင်ဆာ ဆိုသည်မှာ မဖြစ်ခင်ကတည်းက စစ်ဆေးမှုများပြုလုပ်နိုင်သလို အချိန်မလွန်ခင်သိရလျှင်လည်း ပျောက်ကင်းအောင် ကုနိုင်သောရောဂါဖြစ်ပါလျက်နှင့် သေဆုံးမှုအများဆုံးဖြစ်နေရခြင်းမှာ အလွန်ပင်ဆိုးရွားသော ဖြစ်ရပ်ဖြစ်ပါသည်။ မိမိတို့လို ဖွံ့ဖြိုးဆဲနိုင်ငံများတွင် ကုသခြင်းထက် ကာကွယ်ရေးကို ဦးစားပေးရမည်ကို ပုံမဖော်နိုင်ခြင်း နှင့် ကျန်းမာရေးဗဟုသုတအားနည်းခြင်းတို့ကြောင့် ယခုအချိန်အထိ သေဆုံးသူအမျိုးသမီးအများအပြားရှိနေရခြင်း ဖြစ်ပါသည်။ အစိုးရမှ အခမဲ့ထိုးနှံပေးခြင်းကို လက်လွတ်မခံဘဲ စာရင်းပေးသွင်းစေလိုပါသည်။ လက်လွတ်သွားခဲ့လျှင်လည်း စစ်ဆေးမှုများကို ပြုလုပ်ပေးသင့်ပါသည်။ သို့သော် အခကြေးငွေတော့ ကုန်ကြမှုရှိမည် ဖြစ်ပါသည်။

By : Yathaw